الحب

 #الحب_فلسفيا

قرا وماغاديش تندم ..
السلام عليكم .. ديجا هضرت على الحب من وجهة نظر علمية .. ودابا غانهضر على الحب من وجهة نظر فلسفية بغيف ..

ماغانتكلمش على الحب فالأصول العربية لمهم الحب يعني كله العذاب فالأصول العربية (حب أحب يحب) بمعنى سقط ولم يستطع القيام على سبيل المثال
أحبت الناقة بمعنى جلست ولم تستطع النهوض ..

كاينين تصورات فلسفية على الحب كآنفعال l'amour passion الحب هوى بمعنى فلسفيا أهواء النفس .. حسب النظرية التقليدية حول الأهواء عند أفلاطون كيعرف الهوى بأمراض الروح .. وتقريبا هاد التعريف بكون الحب مرض !! كاع الفلاسفة تافقو عليه بكونه شي حاجة على الأقل سلبية .. كانهضر على الفلسفة الكلاسيكية .. اما المعاصرة نوعا ما عطات واحد الإيجابية للحب .. بغييف حنا لي كيهمنا الكلاسيكية اسيدي نبداو ..
مثلا :

غانبدا ب #اسبينوزا حيت كيعجبني التعريف ديالو .. اسبينوزا كيقول " الحب ليس إلا فرح مصحوب بعلته الخارجية " بمعنى الشخص الخارجي هو سبب في فرح النفس ديالك ..

#جون_جاك_روسو كيقول .. الحب خاصنا نديرو منو أطونسيو حيتاش كيصنع لينا عالم وهمي كيشبه للعالم الأصلي لي كيخلق لينا واحد النوع من الإستيلاب
عندو نص صغير جدا كيقول " الحب ليس إلا وهما .. إنه يترك لنا وجودا آخر يجعلنا محاطين بأشياء لا وجود لها إلا في أذهاننا " .

موراه اسيدي #كانط (كيف كاتعرفو كانط فيلسوف تاقوي أخلاقي تابع للمسيحية البروتيستانتية ) كيقول : "الحب أكبر خطر يتهدد الفرد " بما أن ماهية الإنسان الأخلاقية عند كانط هي الواجب وأن لي كايحرك الحب هو ديك اللذة والرغبة .. إذن الحب كيتعارض مع الأخلاق المطلقة لي كاتهدد الإنسان بأن يفقد إنسانيته .. إدن ماخصناش نقلبو عليه ومانطيحوش فيه أصلا ..

ندوزو #لجاك_لاكان اسيدي كيقولك أن تحب ( بكسر الحاء) في الأصل هو أن ترغب في أن تحب ( بفتح الحاء) إنك في النهاية لا تحب إلا ذاتك .. وكيقول واحد التعريف رهييييب آخوور .. " الحب هو أن تعطي لأحد شيئا لا يريده ونحن لا نملكه " بمعنى أنك غاتعطي شي حاجة ماعندكش لواحد ماباغيهاش حيتاش الشخص أصلا كايبغي راسو يريد ذااااااته .. باش تفهم هادي خاصك تكون عندك مع التفلسف ..

إلى خديناها بالجدل الهيغلي غاتولي موضوع تشييئي ضرفي حيتاش غاتولي عبدا مغاتوليش شخصا مستحق للإهتمام أصلا

 #نيتشه
ديجا ناقشنا القولة ديالو هنا ف الكروب نعاود ندكر بسرعة .. نيتشه كيقول .. باش نستامرو ف الصداقة ومانطيحوش ف الحب يجب أن يكون هناك تنافر جسدي بمعنى واحد فينا خصو يكون خايب يكون مازوينش باش تكون صديقي ومانديركش حبيبي ..

 #باسكال ..

غانعطيكم نص مطرجم من الفرنسية من كتاب pensée ومغانشرحوش بزاف يقول باسكال :
" إذا كان هناك شخص يحب شخصا بسبب جماله ، فهل يحبه فعلا ؟ لا ! لأن الجذري (بمعنى المرض المزمن) الذي سينهي جماله دون أن يقتل شخصه سيجعله شخصا غير محبوبا .. ثانيا ، إذا أحببنا شخصا بحسب تقديرنا له ، بحسب قوته الذهنية ، وبحسب قيمته عندي ، أو إذا أحببت شخصا بسبب ذكائه وفطنته فهل أحبه فعلا ؟ لا ! لماذا ؟ لأنه قد يفقد ذكائه وفطنته .. أين هو إذن هذا الأنا الذي ينبغي أن نحبه والذي ليس هو لا الجسم ولا الروح ، وكيف يمكن أن نحب الجسم أو الروح إن لم يكن الأمر متعلقا بخصال فيهما وهذه الخصال ليست هي ذلك الشخص بما أنها قابلة بأن تنعدم فيه .. هل سنحب ماهية أو جوهر الروح الخاصة بشخص ما بشكل مجرد بمعنى هل نحب المجردات ؟ هذا محال !! إننا لا نحب شخصا بل نحب صفااااااااات " لي يمكلينا نفهمو هو أنه كانبغيو صفات لي ف الشخص حيت زوين حيت عندو المال حيت كيلبس مزيان فلحظة نقلبو عليه إلى تحيد منو هاد شي كامل وهذا فعلا يعاش لهذا كيقولك باسكال "الحب لا يوجد" " الحب وهم"
بالنسبة لشوبنهاور عندو قولة رهيبة حول الحب " الحب خدعة الطبيعة من أجل التوالد " باش نفهمو هادي خصنا نفهمو أولا فلسفة شوبنهاور الخطيرة أجيو تفهموها ..

#شوبنهاور
وأخيرا ... شوبنهاور يقول " الحب خدعة الطبيعة من أجل التوالد " وباش نفهمو هاد النظرية البسيطة والعميقة خصنا نفهمو فلسفة شوبنهاور لذا قررت نشرح فلسفة شوبنهاور و لي فهمها غايفهم مضمون القولة .. شوبنهاور بلا ماندوي عليه شكون هو ابحثوا تجدوا .. سيرته الذاتية موجودة .. فيلسوف غريب جدا .. كاتهمنا فلسفته .. عندو كتاب سميتو "العالم كإرادة وتمثلات" وكيبين بشكل واضح فلسفته .. شوبنهاور كيقول أن العالم شيئان :
العالم في ذاته : لي كيعتابرو هو الأصل .. و هو لي كيسميه العالم كإرادة .. والإرادة كايعني بيها الطبيعة .. والطبيعة هي ديك الحركة والهياج الدائم لي ماكيتقاضاش صباح مساء ماعندوش أصل وماعندوش نهاية دورة حياة يولد هادا و يموت هادا يتبدل هادا يتحيد هادا إلخ .. ويلا جينا نهضرو بلغة نيتشه العالم كإرادة هو داك القوة الأولى العمياء و الصماء قوة لي مكاتساليش بتاتا و مايمكنش لينا نعرفو منين جات تتواجد ف الطبيعة . والإخوان الملاحدة المحترمين غايفهموني كتر ..
العالم كتمثلات : بمعنى كيفاش كنتمثلوه حنا وكيفاش كانفهموه حنا .. لي كايتضمن مفاهيم بزاف مثل الخير و الشر و الحب والموت و الشياطين و الملائكة إلخ إلخ .. وكيتعتابر هاد العالم هو فرع من عالم الإرادة و القوة .. وعالم التمثلات هو لي كاينتامي لعالم الإرادة بمعنى نحن البشر لي كانتاميو للطبيعة و ليست الطبيعة لي كاتنتامي لينا و الدماغ لي كانفكرو بيه هو منتوج مادي( مواد كيمياوية) لعالم الإرادة ماشي عالم الإرادة وعالم المواد هو لي كينتامي للدماغ ..
ف بالتالي قوة الطبيعة كاتدفعك باش تزاوج وتولد باش تستامر الحياة و الحب هي خدعة الطبيعة من أجل توالد موجوداتها .. ومن هنا نختم موضوع الحب من منظور فلسفي .. شكرا لتتبعكم.