علوم بتخسار الهدرة

#كوسمولوجي
#اسطرولوجي
علوم_بتخسار_الهدرة

شي معلومات على هاد التخربيق لي ضاير على ماتأنسطالات لييا واحد اللعبة.
.الارض كاينة فمجرة درب التبانة، هاد درب التبانة فيها تقريبا 200 مليار نجم و لي القطر ديالها هوا 1،000،000،000،000،000،000 كيلومتر او 100000 سنة ضوئية.. حنا جينا بعاد على الصونطر ب *8kpc او 26000 سنة ضوئية

هاديك * 1kpc كاتساوي تقريبا 3.26 سنة ضوئية

.فالوسط ديال المجرة ديالنا و اغلب المجرات كاين ثقب اسود عملاق، فالحالة ديال حومة الحليب الثقب الاسود عندو كتلة ملاحظة ديال الشمس، 4 دالمليون مرة، سميتو ساجيطاريوس آي.
.الارض تاضور على الشمس بسرعة 107،000 كيلوميتر فالساعة و الشمس (بالمجموعة الشمسية كاملة) تادور على وسط التبانة بسرعة 700،000 كيلومتر فالساعة، و حيت الكون تايتمدد، المجرة تاهيا غادا سيزيام ب 2،200،000 كيلومتر فالساعة.
.لا كنا غاديين بسرعة الضوء خاصنا قل من ثانية و نصف باش نوصلو للقمر، 4 سنين و 100 يوم باش نوصلو لأقرب نجم خارج المجموعة الشمسية، 26،000 عام باش نوصلو لساجيطاريوس آي، 2،500،000 عام باش نوصلو لأقرب مجرة لينا، و 78 مليار عام باش نوصلو لحدود الكون الملاحظ لحد الآن.
.القمر بعيد علينا ب360،000 كيلومتر كأقرب جسم للارض و راه تايبعد علينا ب4سنتيمطر فالعام حيت السرعة ديال الدوران ديالو على الارض تاتزيد (ماكاينش احتكاكات فالفضاء و من غير الارض و الشمس ماكاينة تا حاجة قوية لدرجة انها تنقص ليه من السرعة ديالو).
.لا ماكان لا سحاب لا ستة حمص ممكن للواحد يحسب بعينيه 3،000 نجم ماكسيموم، 100،000 بطيليسكوپ صغير، و هادشي را تا خرية حيت غير المجرة ديالنا فيها تقريبا 100 مليار نجم، و هابل (الطيليسكوپ الغني عن التعريف) عطى تقريب لعدد المجرات الملاحظة، بين 100 مليار ل200 مليار مجرة، ضربو الحساب لشحال من نجم كاين، غادي غي نكتر لملاير هنايا.
.الحرارة فالارض بين ناقص 50 و 50 سيلسيس، فالقمر بين ناقص 153 و 107، فڤينوس (الزهرة) تقريبا ديما 462، سطح الشمس 5،700 درجة و نواة ديالها 15 مليون درجة، السوپر نوڤا تاتكون حرارتها 100 مليون درجة عل الاقل منين تاتفرڭع، و اكبر درجة حرارة وصل ليها الانسان 2 دالمليار درجة اما اكبر درجة حرارة دازت فتاريخ الكون هي 140،000،000،000،000،000،000،000،000،000،000 درجة، مور البيغ بانڭ ب10 اس ناقص 43 ثانية.
.كاين على الاقل 100 مليون ثقب اسود فدرب التبانة، و ما لا يحصى ديال الثقوب فالكون كامل حيت كتار بزاف (شوف فالسما دابا، اي نقطة شفتيها ماتاتبريش عندها حظوظ كبيرة تكون ثقب اسود).
.الثقوب البيضاء فرضية تايضرسوها مؤخرا، ماعارفينش واش غادي يكونو ولا لا، المهم دابا كاين 0 ثقب ابيض فالكون حيت العمر ديالو باقي صغير بزاف باش يتكون ثقب ابيض ولا بلي تايطراو بشكل مفاجئ و ففترة زمنية قصيرة بزاف (تاتختالف الفرضيات على المصدر ديال هاد الثقوب و لكن كاين بزاف تايقولو بلي غادي يكونو فالمستقبل، و كاين لي تايقولو بلي الانفجار العظيم جا عن طريق ثقب ابيض، لا لقيت اسئلة على الموضوع غادي نكتب مقال).
.كاين على الاقل 60 مليار كوكب فالكون لي ممكن تكون فيهم حياة، و مارس هو اكثر كوكب معروف لي يمكن للانسان يعيش فيه، غير هو الهواء ديالو بحال الهواء تما بحال الهواء ديال الارض لا طلعتي 16 كيلومتر فوق البحر (4 ديال توبقالات واحد فوق لاخر) و سطرو على معروف حيت كاين احتمال كبير يلقاو ما كتر من مارس فالسنين القادمة.
.اكبر (فالعمر) كوكب معروف سميتو ميثوزيلاه، 12،400 سنة ضوئية باش بعيد علينا فعمرو 12 مليار و 700 مليون عام، و تايشكل علامة ستفهام كبيرة على كيفاش دار تكون حيت غريب يتكون كوكب على قدو ف مليار سنة فقط من مور تكون الكون.
.كاين كواكب تاطيح عندهم الشتا حجر، ما قاطع (لاسيد)، لاڤا و حتى الالماس، نيت كاين واحد الكوكب سميتو 55 كانكري ضارب الارض فجوج فالحجم، تقريبا كلو الماس، تايسوا 29 نونيليون دولار (29 موراها 54 زيرو).
.معلومة غريبة شوية، آيتش دي 188753 كوكب بعيد علينا ب 151 سنة ضوئية تايضور على ثلاثة ديال النجوم، تايدور على نجم لول، و بجوج تايضورو على نجم ثاني و بتلاتة تايضورو على نجم ثالث، فورصوم و صافي ههههه
.النجوم الكبرى فالكون غاليباً تايكونو نجوم متوحشين ولاد الكلاب، تايقصيو نجوم صغر منهم و تايحبسوهم فالوسط ديالهم. هادشي تايطرى منين تايكونو جوج نجمات وحدة حدا لاخرا (بحال 80% ديال النجوم لي تكتاشفو) و وحدة تاتكون كبر من لاخرة و "تاتاكلها" و تاتبقى بوحدها.
صافي عييت من الكتابة، الخمسة دالصباح هادي أ الخوت و داكشي تآنسطالا، لا كان شي موضوع خاصو الشرح كتبوها فكومنتس نكتب عليه مرة جاية.
نسيت، راه هادشي كامل غير باش تعرفو شحال حنا صغار و بلي غالباً حنا ماشي بوحدنا فالكون.
المصادر : https://www.nasa.gov
http://www.space.com/
http://www.physicsoftheuniverse.com
الصورة باين شنو فيها، طرجمت داكشي لي ماكانش باين و مالقيت كيندير للسميات لاخرين حيت العربية غادي تسطيني لا بقيت نطرجم كلشي.