أحسن بكالا

 #الجيل_الذهبي

فاش نجحت فالبيت الخامس ابتدائي شرا ليا الواليد بيكالة من الجوطية باربعطاشرميا .. فيها كيدون عوج أو بيدال وأحد أو ماعندهاش السرج كاينة غير الحديدة ديالو مصدية تبرك عليها يجيك مرض الكزاز تولي ميت مخشية فيك حديدة يصحابك الدود غير كنتي كاتكال فالحياة. هههههههه

المهم شديت هاديك البيكالة ستيكيتها مزيان، ديجا الصيف اللي فات دوزتو عند السيكليس يعني ديجا حرايفي، صرعتها ولات كاطير أو زدت تخبرت عليها مزيان سوديت فيها واحد الشاكمة مفركعة فالجنب كانعمرها كواغط أو كانشعل فيهم العافية.. ويلي با مانعاودش ليك، أو باش كانسرعها كاع كانخشي شي كاس ديال رايبي فالرويضة لور مابين الباتانات كايولي واحد الصوت فحالا صايك هارلي، دخلت للتاريخ بهاديك البيكالا كاع ولاد الدرب كايعتارفو بيها كنت كانفزعهم كاملين فالطريق..
واحد النهار مورا الغدا هو يبان ليا البلان فيها، اشغاندير ماغندير أجي نسبغها بالكحل، أو ندير فيها هادوك اللسقات ديال العافية باش تبان مستيليا مزيان ... ترا مشيت بعيييد تيقت رآه عندي هارلي😂😂😂 ،مهم خرجت من الدار قاصد الدروغري تلاقيت مع ولد حياة سبع صنايع او الرزق ضايع، عاودت ليه البلان حيت هو فايت ليه طولوري.. قالي اودي رآه ماعمر الصباغة تشد ليك خاصك حتى تحرق الصباغة اللولة أو تحكها بزيرو عاد تعاود تصبغ .. دغيا بيعني للعجل وديلكب مشيت ديركت جبت واحد قرعة الدوليو او طلعت لسطح خويتها عليها مع لحت الوقيدة او هي تنتاشر العافية شدات فواحد المانطا أو النشير او شي سدادر مليوحين فالقنت او الرويض طلقو دخان ... انا هربت عند الجيران .. ولاد الدرب قلت مايدار التدخل السريع كايتسناو غير فحال ها شي،، كلهم طالعين شي كايقول بوطا شي كايقول المكانة وتفركعات.. مهم فالاخير طفات العافية أو تفرتكات الجوقة، أنا من عند الجيران هربت يوماين وانا كانبات غير عند عمتي كانت مخاصمة مع الواليدة، عارف ألا رجعت لدار ديك الساعة ممكن يكون الواليد باقي فالحبس لدابا.

 أو أنا باقي لدابا فينما نتلاقى مع ولد حياة كانقوليه سير الله يحرق جدبوك الكلب بسبابك ضاعت احسن بيكالا يشهد لها التاريخ فالدرب.