La vie

#نمط_عيش
(و العيش شيء غير الحياة)

فاش كاتبغي راسك، كاتبغي روحك و الجسد ديالك، فاش تاتكون عارف راسك اش باغي، و شكون نتا، و شنو الهدف ديالك و فين باغي توصل .. ماتحتاجش تسول شيحد، ولا تديها فشيحد، ولا تشرح لشيحد.
الناس اللي تايبقاو يفسرو، ويشرحو، ويبينو حوايج اصلا ماسوق تاحد فيهوم ، راه مريض، يا نفسيا يا عقليا. ولا منافق. وتا وحدة فيهوم ماحسن من الاخرى.
ماتنساش بلي دينك، معتقدك، اديولوجيتك،علاقاتك، اهدافك و حياتك الشخصية ، راه ديالك، بوحدك! نتا تاتحكم فيهوم ماشي العكس، نتا تاتختارهوم ماشي العكس، و تاكد بلي ماحد شيحاجة مفروضة عليك، راك مازال مالقيتي راسك. و فاش تادير حاجة بكامل ارادتك ونتا مقتانع بيها اللي دوا غايجيك غا تايخربق.

عادي ماشي كلشي تايلقى راسو، و كاين اللي تايرض راسو الشخص الغلط! داكشي علاش حنا عايشين مع بنادم مريض فراسو شوية.

ماحدك تاتكلاصي الناس علا اساس دينهوم، لونهوم،اصلهوم، اشياء خصوصية ديالهوم، ولا تاتكلاصي الناس اصلا كيفما كانت الوسيلة، وحتا الغاية عرف بلي راك غا تاتستهلك أكسجين الأجيال القادمة.

فاش بنادم تايخليك ويشوف شخص اخر، ونتا تبقا لاصق فيه، وتاتخرج الاشاعات باش ترضي المازوشيست اللي فيك ، وتايعجبك اللي يملكك و يحكم فيك وينخلك وتايعجبك تبان مظلوم و مسكين و كولشي معدي عليك باش تحس باللذة،  عرف راسك بلي راك غا حي ماشي عايش .

فاش تايصحاب ليك راسك وصلتي حيت قرتي 2 حروف ديال المدرسة و 2 كتوبة ديال باولو .. عرف راسك غا مgيد ، وعاجباك التكgييدة .

فاش تادير شيحاجة باش ترضي شيواحد، ولا تبين لشيواحد شيحاجة، راك غا تاتخربق.

  فاش تاتنسى راسك شكون نتا، و شنو درتي، و فين وصلتي ، و تاتبان ب واليديك و اش دارو، عرف راسك مازال واقف فالعتبة.

فاش تاتستغل ناس ضريفين، و ملي تسالي تقلب علا كولشي ، تحت ذريعة هوما اللي خايبين و اذاوني، و اللي ماقلبتيش عليه تاتنافق فيه، عرف راسك مريض.

فاش تايصحابك العالم تايدور عليك، وبنادم حاضيك، و اللي دوا راه دوا عليك، عرف بلي جاك الوسواس القهري و حالتك صعيبة.

فاش تاتخلق شخصية أخرى و وجه اخر و حياة اخرى باش تتفلى علا الناس تدوي معاهوم و تدير بلاصتك بيناتهوم، عرف راسك مازال تا مالقتي تا راسك، مازال تا ما حاولتي .

فاش تاديرهوم ب 18 بالتخبية، و الي دار شيحاجة تاتهاجموا ..

فاش راسك مامحكمش فيه وتبغي تحكم فالناس،

فاش الضحك تايكون فيك، و تاضحك علا الناس ،

فاش فاش فاش و فاش ... عرف راسك غا تاضيع وقتك، وفين ما وصلتي غاتبقا مكلاصي مع المراض ،و كيما كنتي عمر شيحد ايعتابرك مثقف، ولا قاري ولا واصل ..

الهدف ديال للإنسان يعيش مرتاح، وباش تعيش مرتاح خاصك تبغي راسك، تما غاتوصل لواحد المرحلة غاتولي فيها محايد، لا من جيهت الفلوس، ولا الدين، ولا الاصل واللون و اللغة. تما غاتولي مستقل من العالم و تقد تعيش بوحدك واخا النباح كثير. اصلا داكشي كامل غا عبث، حوايج مادايمينش.

 و ماتنساش بلي "نظم المجتمع" حطوهوم ناس عاديين، غير كاملين، واخا يتجمعو كاملين، و داكشي تايتطور، ايوا لاتبنيش حياتك علا حاجة اصلا ماشي مؤكدة.

تايعجبني نعيش فجماعة ، ولكن ختارين نعيش بوحدي. ولا معا الي نحس بيه بحالي.
تاندوي 5 اللغات، و تاتعجبني العربية حيث تاتوصل حسن.
و باغا نوصل ، لكن ماشي علا ظهر شيواحد.
و الدين حاجة زوينة، ولكن ختاريت نبعدها من دماغي و مانربطش بيها اي حاجة فحياتي.
تايعجبني الفن، و اي حاجة تانشوف فيها الجمال.
و عندي افكاري و معتقداتي، و ماتانهاجمش اي واحد ضدي .

تايعجبني نعيش فالمجتمع، وحيث ماشي كولشي بحالي، ختاريت نعيش بوحدي.

Mariage

#تطور_الزواج

ارتباط زوجين وتربية الأطفال أمر قديم بقدم الإنسانية نفسها ، ملي بانت المجتمعات الزراعية المستقرة هادي 10 آلاف سنة كان الزواج واحد الطريقة لحماية الحق فالأرض و الممتلكات من خلال جعل أطفال مولودين تحت ظروف معينة ورثة شرعيين . ملي هاد المجتمعات ولات اكثر اتساعا و تعقيدا الزواج مابقاش غير مسألة بين الأفراد و العائلات بل كذلك مؤسسة رسمية تتحكم فيها السلطات الدينية و المدنية ، و كانت مؤسسة معترف بيها قانونيا سنة 2100 ق.م باش كانت القوانين المكتوبة لي بقات من قانون "أرو نمو"  تملي التفاصيل التي يجب توفرها في الزواج من عقوبات زنى إلى المكانة القانونية لأطفال العبيد .
بززاف الحضارات القديمة سمحت ببعض أشكال الزواج المتزامن متعدد الأطراف ، و حتى فاوقاتنا هادي فإن ربع ثقافات العالم تمنعها ، لكن مجرد كون أمر ما مسموحا به لا يعني انه دائما ممكن . الحقائق الديموغرافية و الرابط بين الزواج و الثروة كاتقولنا انه واخا النخبة و الحكام فبلاد الرافدين القديمة و مصر و إسرائيل كان لهم عدد الزوجات و المحظيات، معظم عامة الشعب ماكانوش يقدرو ينفقوا الا على زوجة وحدة ولا زوج كاع مما يميل الى الزواج الأحادي ، فبلايص اخرين الامر مختلف حيث ان بامكان المرأة الحصول على عديد من الأزواج كيما فجبال الهملايا حيث ان كاع الإخوة من عائلة واحدة كايتزجو نفس المرأة للحفاظ على الأرض الخصبة الصغيرة من الاقتسام بين أسر جديدة.
الإعتراف بالزواج المثلي من قبل العموم كان قد ظهر في مختلف الحضارات على مر التاريخ ، الصلوات من بلاد الرافدين كانت تحتوي على مباركة لهاد الأزواج ، بينما حظي الأمريكييون الأصلييون بعلاقات مع كلا الجنسين ، الحالات الأولى التي تعتبر هذه الإرتباطات في خانة الزواج جات من روما ، فاش تزوج الإمبراطوران نيرو و إيلاغابالوس من رجال فاحتفالات علانية ، و لكن الأمر ولا ممنوع سنة 342 بعد الميلاد واخا تقاليد مشابهة بقات لواحد الفترة فالحقبة المسيحية مثل تقليد Adelphopoiesis او "صناعة الاخوة" في الكنائس الأرثودوكسية بل و حتى زواج فعلي بين رجلين تم تأريخه في كنيسة صغيرة إسبانية سنة 1061.
الزواج لم يكن ضروريا فقط بين شخصين على قيد الحياة ، زواج الأشباح : حيث يكون أحد الأطراف ميتا، كان امر يحدث فالصين بهدف مواصلة النسل العائلي أو لإرضاء الأرواح الغير هادئة ، و بعض القبائل فالسودان مازال محافظة على بحال هاد الممارسات .
رغم كل هذه الإختلافات ، فإن عديدا من الزيجات عبر التاريخ كان كايجمعها امر مشترك مع تواجد امور جدّية كالأملاك و التكاثر على المحك لقد كانت في غاية الأهمية لجعلها مرتكزة على الحب ، خاصة فالطبقات الثرية ، كان الزواج مدبر من قبل العائلات او الحكام.
الفكرة الحديثة للزواج عن كونه يرتكز على الحب و العشرة بانت غير هادي واحد القرنين من الزمن مور الثورة الصناعية و التمدن و نمو الطبقة الوسطى ، اصبح عدد اكثر من الناس مستقلين عن العائلات الكبيرة الممتدة و كانو قادرين على إنشاء اسرة جديدة بوحدهم .
مع وجود أفكار جديدة مشجعة من عصر التنوير بداو الناس يركزو على السعادة الذاتية و البحث عليها فبلاصة مايركزو على واجباتهم الأسرية او المنصب او الثروة لفترة وجيزة من الزمن ، و هاد التركيز على السعادة الفردية قاد سريعا الى تحولات أخرى ، مثل تخفيف القيود على الطلاق و تأخر سن الزواج .
فاش ناقشو هدف و مفهوم الزواج فالعالم الحديث من المفيد نديرو فبالنا ان الزواج كان دائما نتاج المجتمع و مع تغير بنية هاد المجتمع و مبادئه و أهدافه مع الوقت فحتا أفكارو حول الزواج غاتبقا تبدل وفقا لذلك .
شكرا على القراءة ❤️
بس : الصورة من فيلم Allied تفرجو فيه

غسل الوجه

#لافاج_دو_فيزاج

المشكل ديال وقتنا هو أنه كلشي ولى بالمظاهر , القشور دارو إنقلاب و هوما لي ولاو حاكمين  مجمل مناحي الحياة الإجتماعية ديالنا , المقود هو أنه المظاهر مبقاتش غير مجرد أداة للتفريق الطبقي و غير بارة بين البشري , دخلنا فواحد الدوامة ديال تقديس لومبالاج  و خلينا اللب ديال أي حاجة ,  بنادم فهاد الوقت كيصلي على سجادة ديال الدهب و لكن القبلة فالجهة لاخرا , للأسف هادشي كينطابق تا على العلاقات الغرامية ,  في ظل عصر الويفي فكل قنت و الأفلام بيراطي فيهم قوة الزعت و لي سيري كاملين خيال عاطفي و الكليبات ديال التقحبين و الهضرة فازكة , شيئ عادي يولي الحب فنظر الكتاكيت ديال هاد الوقت مجرد زواق و تويشيات و تناوي , الحب ولى كيتقاس فوقتنا بتصاور  " واو فلان و فلانة كيلوحوا تصاور فلانسطا شحال كيبغوي بعضهم " ولى لاموغ هو تشد لساطة فيدها أمام الملئ ولا تشري ليها الورد و تبوسطي ليها فالمير " أحببتك فغار مني القمر " و  ف 12 فبراير تلبس الحمرفحال الغلاقة ديال كوكا و تدير ليها سوبرايز فالخدمة ولا فالقراية  تبقى تنقز عليها فحال القرد ... مزيان تبينوالحب لبعضكم وي ... مي ماشي للناس أزبي .  بزاف شادين حاجة زوينة فحال الحب من بلاصة خايبة ( نقدرو نقولو على الزك بلاصة خايبة ؟ ) , كيبقاو فيا دك الناس لي كيشوفو فسارة و أبوجاد كوبل مثالي ولا فدك فالمراكشي و تونسية هوما عصافير الحب ... الواليدا ديالي كتقولي ديما " الزواق كيطير كيبقى غير الصح الصحيح " لاموغ ماشي هو سنابات معانقين ولا مشادين اليدين كتاكلو سوشي ... لاموغ ماشي هو تدير فيديو جايب ليها الشكلاط و تبوسك و تقولك جوطيم ...  ثيق بيا جوج لي كتباغاو بصح جامي غادي يبغوي يبينوا داكشي لبنادم ولا يقولو ليه " كوكو شوفنا وي أر إن لوووف "  حيت ببساطة عارفين بلي داكشي لي يبناتهم كبر من أن وحدين أخرين هوما لي يحكموا عليه  ...  الحب كبر من هادشي كامل , الحب فوندو , عرفتي الحب فين كيبان ؟ فالمصايب ولد القحبة ههه عند المواج الكبار كيبانو العوامة , الحب و المخزن فالبلاد فحال فحال , وقت المشاكل كيغبرو للأسف  وقت الفرح كلشي غادي يبغي يشاركها الضحكة و لكن فالوقت المقود غادي يبكي معاك غير كيبغيك ديال بصح , هادشي كينطابق تا على لي غولاسيون , فأخر المطاف غادي تلقى فجنبك غير " الصح الصحيح " , وقت الزهو و التصاور و التسركيل و الضحك غادي تكون معاك و تقول ليك نتا حب جياتي و جامي نتفارقو و لكن نهار غاي تأزم الأمور بيناتكم و يقوى الصداع و المشاكل غادي تقولك انا عييت من هادشي و مغاديش نتفاهمو من الأحسن نسالوي و غادي تخلي ربك بواحد زربة ديال لوطيس دو لييغ ... و دك ساعة سير مسح بدك تصاور طرمتك ههه , هادشي حيتك بأبسط مثال ,  "مشاكل بيناتكم" ... اما أزبي إيلا جيت نشرح ليك كيفاش أنه إيلا طحتي فشي مشكل خارجي واخا غير بسيط تقدر تدير ليك سوس لبن خصني مقدمة إبن خلدون , كنعرف واحد الساط مفاليداش سالات معاه الساطة  هههه الماكياج را كيزول غير بكاس ديال الماء , دونك براكا ماديرو الماكياج لي غولاسيون ديالم حيت لدنيا را دايرا فحال سرباي ديال القهوة , هازة صينية و كدور ههه فأي وقت تقدر تجيب ليكم الكاس ديالكم

المملكةالعربية السعودية

#المملكة_العربية_السعودية

 فالكتاب ديال (العالم ما بعد الولايات المتحدة) للكاتب ديالو #فريد_زكرياء لي قال بلي دول مثل الصين و الهند و البرازيل و تركيا و #السعودية غادين يحتلو الريادة في العالم , قلت ارى نشوف هذ الناس لي كيقولو عليهم شاربو بول البعير كيفاش البلان ديالهم و نقارنهم مع شاربو البيرة لي هما حنا ؟ و انا نمشي نقلب و لقيت هذ المعلومات :
          تاريخ تأسيس المملكة:  1932 , عدد سكان :27 مليون نسمة , المساحة: 2,250,000 كيلومتر مربع , اكبر دولة في الشرق الأوسط  من حيت مساحة .
       الصناعية:  كتعتمد على النفط و الغاز الطبيعي و تكرير بتروكمياء , الأولى عالميا في انتاج النفط و احتياطه , الخامس في احتياط الغاز الطبيعي , و كينا بزاف اشياء لي كتصنع لكن انا ركزت على الأهم , لكن رؤية المملكه لي سنة 2030 هي تولي دولة صناعية و ترجع هذ المحروقات غير ثانوي .
      متوسط الدخل الفردي للمواطن السعودي حولي :30ألف دولار في السنة قريب 30 مليون سنتيم مغربية في حين حنا باقين كنعشو على اقل من دولار في اليوم.
   
       التعليم: عند شاربي بول البعير هارب بزاف على شاربي البيرة , حسب تصنيف الأخيرة للجامعات حول العالم ,منظمة #كيو_إس QS قائمة كانت فيها 863من جامعات العالم جات (جامعة الملك فهد للبترول و المعادن ) الرتبة 216 عالميا و الأولى عربيا و أربعة جامعات ضمن العشرة الأولى عربيا كلها سعودية و حده من لبنان الجامعة الأمريكية 3 من الإمارات وواحدة من البحرين , وفينك يا المغرب بلد التفتح الفني و مهرجان موازين !!! تقرير كانت نشرتو هسبرس قالت بلي جامعات المغرب ليست ضمن قائمة 1000 ألف جامة في العالم , و فينك يا جامعة الأخوين اه بلحق يمن تكن جامعات المغرب الأولى جنسيا في العالم ممكن
     مؤشر التنمية البشرية الصادر سنة 21 مارس 2017 عن الأمم المتحدة لي المقر ديالو في ستوكهولم شاربي بول البعير في المرتبة 38 عالميا و الثانية عربيا بعد قطر و لي موراهم كاملين ول خليجية,  دولة آمير المؤمنين عرفتو شمان مرتبة ههههه أقسم بالله تا تصدمت دول فيها الحروب متقدمة علينا , جينا مرتبة 123 قبل منا العراق لي فيها الحرب هههه و ليبيا ويا ربي اش هذ شي و صر تا هي , اعطني بيرتي و غني هههه
   الصحة عاوتاني بلا متهضر سكانير لي كنديروه 1500 درهم و دواء لي نشرواه بزبالة فلوس ....كامل فابور, في السعودية متوسط أمد الحياة بين 73/76 حنا كيوصل خمسين سنة كيبدا يترعد و يشدو زهايمر , و معندومش العملية بعشرون مليون اولا مرأة تولد في زنقة بحالنا ابدا بحال مستشفى لي فسيدني اولا سيول بحال لي فجدة نفس التجهيزات و الكوادر , غير باش نزيدك سعوديه توصلو الأطباء ديالها يفصلو توأمين متلاصقين هذ شي غير شوية من بزاف ...
  مؤخرا السعودية صنعت طائرة(أن 132AN) متعددة الإختصاصات نقل ركاب و البضائع حولي 10أطنان و حتى بعد مهام عسكرية بشراكة مع أوكرانيا  ,  السعودية هي الأولى عربيا من ناحية طائرات الحربية المتطورة,  خامس مساهم في صندوق النقد الدولي , عندا صندوق سيادي بحوالي 600 مليار دولار ...
   المغرب منين كضربو الحزقة كيمشي يرغب ويسعى باش يجيب فلوس من عند شاربي بول البعير باش يوكل شعب البيرة في الأخير يجي حزووووق يقولك السعودية و الخليج مكلخين نوض من نعاس را 2017 ماشي 500 ميلادية منين كانو بجمال و ديك تخربيق باقي كتفرج فلم الرسالة,  لولا هبات الخليج لكان المغرب في خبر كان وهذا بشهادات المحللين و نقاد و كبار المصرفيين , بنادم كيكل النعمة و كيسب الذيمة ختو كتصيفطلو الفلوس من تما و هو داير فيها مسخوط  و اذا عطيته فيزا لتما يبات ما يصبح ...
       انا ماشي مع السعودية حيث ما فيهاش الديمقراطية مجرد عائلة عصابه كتحكم على عباد الله. و كاينين ومواطنون سعوديون كيعيشو الفقر المدقع و انتهاكات حقوق الإنسان و انعدام الحرية و بزاف الأشياء لكن انا ضرت على الإقصاد و الصناعة صراحة الناس وصلو و غادين فطريق نتمنى نديرو بحال لي دارو و نمشو بعيد تا حنا سعودية عندا النفط تا حنا عدنا الفسفاط و البحار باش فايتنا ؟
  الخاتمة (لا تقارني بغيري )
  تحياتي/القناص

Mitochondria

#نظرية_الميتوكوندريا

المهم هدا النهار انعاود ليكم واحد البلان غريب على واحد النظرية .. لي كاتقوول بلي الميتوكوندريا كانت باكتيريا ودخلت للخلية وتحولة لعضية مجهرية مهمة
الميتوكندريا : واحد الموطور صغير وسط من الخلية كاتساهم فظاهرة التنفس الخلوي .. يعني كاتفورني الطاقة للخلية ولبنادم من الآخر ، هدا العضية كاتجيب الطاقة ديالها من برى الخلية ولي هي الڭليكوز (على شكل حمض البيروفيك) من بعد كاتشدها وكاتحول على شكل طاقة لي بغا يفهم الميكانيزم كيف كايوقع (نلوح ارتيكل آخر على تدفق الطاقة) من بعد هدا الطاقة لي كاتكون على شكل فوسفاط (ATP) كاتساهم فتحرك الخلايا والكونطراكسيون ديال العضلة وفالتنفس وفبزاف ديال الحوايج .. المهم كايقوولو بأن هدا هدا الموطور جا من برا يعني كان على شكل بكتيريا ودخل وتأقلم مع الوسط السيتوبلازمي وداك الشيء كلو في إطار (التشاركية وتبادل المصالح)  الخلية كاتوفر ليها المواد اللازمة باش تعيش (السكر) وهي كاتعطي الطاقة على شكل فوسفاط ATP وكتقضي مدة الحياة ديالها بيخير من بعد كاتجيها الموت،
لي خلى العلماء يشكو فالبلان ديال الاصل ديالها بكتيريا حيت هي العضية الوحيدة لي عندها 'ARN' و ريبوزومات ( كايساهمو فترجمة ARN) ، وعندها غشاء خارجي وداخلي وحيز بيغيشائي لي ماكنينش عند العضيات وهدا البلان كايكون عند الخلايا او البكتيريا,كاتصنع انزيمات وبروتينات خاصة بيها يعني ڭاع ماكاتسوق للخلية ولا لشي حمض نووي;
كايڭولو بانها من كانت الحياة شحال هدا باديا وكانت يالله البروطوزوير او خلية وحدة دخلت هدا البكتيريا ودارت بلاصتها ^ـ^ تا وصلة لهدا النيڤو ..
ومازالت لحد الآن الابحاث جارية...

#Mitochondria #ADN #ARN

TATTOOS

#Tattoos

"Your past doesn't define you , and that beauty can come out of pain"
ملي كايتلاقا الفن مع المعاناة الجسدية كايعطي "الابداع"
بزاف د ناس كايتلاحو للتاتواج حيت موضة ؛ وحدين كايتلاحو ليه باش يفكرهم ف شي واحد ولا شي حاجة سبيسيال عندهوم .. ولكن كاينين وحدين اخرين كايديروه لسبب مقنع اكثر .. لي هو "يخبيو شي ااثر دائم ف الجسد ديالهوم باغيين يتناساوه"

هادو ناس كل واحد فيهوم كيفاش كانت المعاناة ديالو .. لي كان كايعذب راسو Self harm ف فترة معينة من حياتو ... لي دار عملية جراحية و بقا ليه scar ..الخ .. هوما ف الاصل ما حشمانينش من تكون ف الجسد ديالهوم شي امارة حيت هاديك بيريوض من حياتهوم واخا يحاولو ينساوها ماغاتمحاش من ذاكرتهم.. مي قررو يشوفو ال Bright side من داكشي لي وقع و يخرجو منو شي حاجة "تسر الناظرين" .. حيت كيفما كان الحال فينما تجي عينيك على ديك الامارة ف لحمك غاتبدى تفكر شنو داز عليك و شنو قاسيتي و كيفاش تجاوزتي داكشي بصعوبة.. و سيغتو أن بنادم ما كايرحمش وإلا شاف تاتواج يقدر ينتاقدك ب عنف بدون ما يعرف القصة من موراه و هادشي كايزيد يأزم الشخص

ممكن scar يتخبى كليا ب Tattoo بحيت كايحاولو بعد المرات يربطو الفكرة د Tattoo مع شكل Scar و لا لي كايخليه و كايجي للجوانب ديالو و كايكتب عليه شي حاجة مثلا Strong (يعني واخا المعاناة لي دوزت عدت بقوة)

- كاين لي ف صغرو طاح شي طيحة خايبة خلات فيه اثر مدى الحياة .. من صغرو و هو هازو معاه و كاتفكرو كيف كان بين الحياة و الموت ف لحظة طيش ولا حادثة بالصدفة

- كاين لي حتال مرحلة متقدمة من عمرو لقى عندو cancer عانى باش يتداوى و كملها ب المعاناة فاش كل نهار كاتجي عينيه على Scars لي بقاو كأثر على العلاج

- كاين لي عضو كلب فاش كان صغير من غير طراس لي خلا ليه ف لحمو اثر عليه حتا من الناحية النفسية و كبر ب فوبيا من الكلاب ..

- كاين لي دار عملية جراحية على مستوى الركبة ولا الفخد ولا العنق ولا الصدر ولا العمود الفقري ولا اي بلاصة ف الجسد و كان عرضة ل معاناة جسمانية و نفسية صعيبة بزاف

- كاين لي عندو scars نتيجة اعتداءات وقعو ليه ف حياتو ... سوا ف صغرو من طرف احد الوالدين او صحابو ف المدرسة ولا ف الحي ؛ سوا اعتداء جسدي بين الازواج .. سوا اعتداء د شي شفار بغى يgريسي صدق مخسر الاخر ف يدو ولا ضهرو ولا .. ولا ... الخ

- كاين الناس د self harm بالعراام .. ملي كاتكون ف بيريوض د Depression و Anxiety او بالاحرى كاع ال Mental illnesses .. ف لحظة ما بدون شعور كاتبدى ف التعذيب الجسدي ل راسك بدون رحمة ولا شفقة و كاتبغي تخرج داك الالم لي عندك الذاخل لأرض الواقع

- كاينين ناس لي فاتو Depression و وصلو ل مرحلة ولاو فيها Suicidal .. حاولو ينتاحرو و ما صدقاتش ولكن الاثر بقى معاهوم واخا تحسنات حالتهوم النفسية

- كاين لي بكثرة ما Addicted للكارو ولا الحشيش و ما حاملش راسو حيت مبلي و باغي يقطع و ما عندوش القدرة باش يطبقها كايستسلم للمصير و كايولي فينما يكمي كايحرق راسو بالكارو كدليل على ان العذاب ديال الحرقة ف الجسد را كاين عذااب كثر منو كايحس بيه ف الذاخل ديالو

- كاين لي نتيجة انه خسر رهان عبيط مع صحابو بقى ليه Scar مدى الحياة ف لحمو

كاين و كايين و كاااين قصص كثاار كايضرو ف الخااطر.. و كل واحد واشمن Tattoo ختار باش يعبر .. هادشي كايخلي الواحد يفكر 100 مرة قبل ما يسول شي حد على قصة Tattoo لي داير .. وكايخليك ما تجرأش تحكم على الآخرين و نتا ماعارفش شنو داز عليهوم .

LeonardoDaVinci

#LeonardoDaVinci_ماشي_غير_رسام_و_صافي

هاد السيد بالنسبة ليا من أعظم الشخصيات اللي دازو فالتاريخ, تزاد ف 1452 فقرية Vinci ف إطاليا, يعني سميتو ليوناردو ولد فينتشي (بحال إلى گلتي ولد الگارة ولا ولد زحيليگة ) علاش؟
حيتاش هو الإبن اللقيط ل Ser Piero  Fruosino Di Antonio Da vinci.ليوناردو دوز 5 سنين اللولة من حياتو فقرية Vinci من بعد مشا ل Florence و التحق بال atelier ديال Andrea di Cione اللي كان معروف ب سمية Verrocchio, رسام معروف ف ديك الوقيتة و بحكم ان ليوناردو كان قافز و راسو خفيف و فضولي تعلم عندو جميع الحرف و العلوم اللي ممكن طيح على بالك, أجي حسب معايا , الرسم، الكمياء، الفلسفة، الهندسة، الماط، الميكانيك، النحت، تحدادت، تخرازت، تخياطت..الخ.
السيد كان منفتح على جميع المجالات و العلوم , مللي ليوناردو كمل 20 عام, دخل لمجال الطب ف the guide of St luke بحال إلى گلتي التكوين فمجال الفن و الطب (ليسطا ديالهوم هه) غير هو ليوناردو ما قنعش بداكشي الي عطاوه على الطب و جاه داكشي ناقص, آش دار ؟ ولا كايشد الجثث و كايشرحهوم و كايدرس الجسم البشري عن قرب..الشيئ اللي كانت كاتحرمو الكنيسة ديك الوقت..مللي سالا من بنادم داز ل الميكانيك..شتي ل پرانسيپ ديال ل helicopter و التحليق هو اللي حطهوم..زيد عليها صنع أول روبو فالتاريخ اللي كان عبارة عن أسد كايتمشى و اللي كان هداه ل الملك ديال فرنسا فرونسوا الأول..من بعد داز ل السلاح و حط الپرانسيپ ديال الدبابة أو المدرعة و حتى القنابل اليدوية..اما ف مجال النحت ف من أشهر المنحوتات ديالو كان ف ميلانو اللي كان عبارة عن حصان كبير Gran Cavallo مصاوب من 70 طن ديال البرونز و اللي مع الأسف ف 1495 الدوق ديال ميلان Ludovico il Moro عطا الامر باش يدوبوا التمثال و يستعملوا داك البرونز ف صنع القنابل للمدافع باش يدافعوا على المدينة اللي كانت تعرضات للهجوم من طرف Charles الثامن..ليوناردو دوز حياتو مابين القرية ديالو Vinci و Florence و Milano و مات ف Clos Lucé ف فرنسا بتاريخ 2 ماي 1519.
و خليت ليكم أحسن ماكان ف ليوناردو دافينتشي حتى الأخير..ليوناردو كان عارف قيمة الأفكار و الإختراعات ديالو و ملي كان كاكتب المذكراته و اللي بطبيعة الحال فيها عصارة سنين حياته دار واحد الپارتية باش يحافظ عليهم من المتطفلين..و بحكم انه كان كايكتب بيديه بزوج يعني عندو كي ليمنية كي ليسرية فكتب مذكراته كلها بشكل عكسي ههه.. بمعنى إلى بغيتي تفهم شنو كتب خاصك تجيب مرايا و تقرا منها ههه..و هادشي خدا من المكتشفين وقت كثير قبل مايفكو اللغز ديال مذكرات ليوناردو دافينتشي و اللي كانت غير بالصدفة ههه